ياگلب كافينـَه

ياگلب كافينـَه

المسلة كتابات –  ميسون نعيم الرومي:
شبعونـَه بچي ..
والروح تبقه حنينه
وك غمك يا گلب ..
ليوين عنده رهينه !
*
دومك رچيچ اوتحن ..
ياگلب كافينه
لاتيأس اولا تهده ابد..
بالضيم ساگينه
*
غربه اوبعيد الدرب ..
والشوگ چاوينه
العين تربي اوما تمل ..
والوكت ناسينه
*
تعبنه هذا الوكت..
بلوات بالينه
هانت نگول اوننتظر..
والفرج چا وينه ؟
*
مشتاگه روحي تـِـرِف ..
للنخله والتينه
الدجله وعذيبي يهب ..
الدهلته اوطينه
*
للناي واللحن الشجي ..
عاشگ أنه اونينه
الگعداتنه اوطيبة هلي ..
يا حلم ودينه
*
ياما گعدنه سوه ..
والحان غنينه
الغيبه طالت تره ..
وانصاف ملگينه
*
بطل رفيف او بس بعد ..
ياگلب تاذينه
راحن اسنين العمر..
يا روحي ما بينه!!
*
ضعنه ابمتاهات الزمن ..
الزين والعينه
اتطشر عقدنه انفرط ..
يا دنيه لمـّـيـنـَه..
-( بـَغـداد) .. لمـّـيـنـَه

 

ينشر موقع “المسلة كتابات” جميع ما يرد اليه، شرط أن يكون خاليا من السب والشتم والأوصاف غير اللائقة على الجهات والشخصيات.

“المسلة كتابات” لا يتحمل مسؤولية الأفكار والآراء الواردة. المقالات والنصوص المنشورة تعبّر  عن وجهة نظر الكاتب فقط. 

Please follow and like us:

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *