نفس الوجوه اترشحت

نفس الوجوه اترشحت

المسلة كتابات – ميسون نعيم الرومي:

عقـديـن امن الزمن والإيـد تصفگ ايـد
نفس الوجوه اترشحت لتضن أكو تجديد
نفس الاحزاب اترشحت واسماء بدلوهَه
اشـنترجه بعد ؟ امن اصوات زوروهه!
نـفـس الوجوه اترشحت سرّاق نصابـَه
يا خير اليجي ؟ امن اشـكول نهابـَه !
اشـْـسـَـووْ گبل واشـراح نترجـَّه
شـو نفس القهر ع الضيم نتوچـَّه
قسموهه الحصص والدوله باعوهه
مليارات النفط بالخـِـرِج حـَطوهـَـه
تنزف تضل والجـوع يـنهـش بـيـك
الاحزاب العشعشت اشتترجه ؟ ماتحميك
اتسحگك سحگ والضيم نفس الضيم
والخايـن وطن .. لا لا أبـد مايـرحم
يـذبح بالشباب او يخطف اويحـْـبـِـس
اينكس بالعگل ! والحلگ خو يخرس
ايطول لحيته وايصلي خمس اوقات
يسـرق خبزتك .. وابعـِـبـَّه مليارات
ينهب لگمتك جاهل مرتزق متسيد
جاي امن العدم .. بفلوسك امعيد
القاب امسفطه (أكاديمي اومهندس،أستاذ هم دكتور)-
تزوير اوچذب بالصدگ :- (فرّاش لو ناطور)-
تاريـخـَـك ياوطن ســحگوه بالرجـليـن
وانت اللي چنت نبراس .. اوضوه للعين
سـلاح المنفلت ، تزوير متريس
ما نوثق بعد .. لا والله ما نيأس
اصحه ياشعب !! اتـْـنـَـوّع اوبـاوع !!
ثروات اتفرهدت وانت العزيز الجايع
مَ انشارك أبد ! لا والله مانقبل
انمانع نمتنع او نصنع الأفضل

 

ينشر موقع “المسلة كتابات” جميع ما يرد اليه، شرط أن يكون خاليا من السب والشتم والأوصاف غير اللائقة على الجهات والشخصيات.

“المسلة كتابات” لا يتحمل مسؤولية الأفكار والآراء الواردة. المقالات والنصوص المنشورة تعبّر  عن وجهة نظر الكاتب فقط. 

Please follow and like us:

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *