بغداد يا بغداد

بغداد يا بغداد

المسلة كتابات – ميسون نعيم الرومي:

بغداد يا بغداد
بغداد يعني الأمل
يعني الفرح يعني الجاه
بغداد موجات النهر تتمايل ..
او عزف الناي
بغداد العمر كله الراح .. ويـّه الجاي
بغداد بلبل يصحي الفجر..
بعيون الورد والأزهار
بغداد نور اونار
بغداد زهو الربيع ..
صيف اوشته .. محلاه خو بيهه
بغداد.. گلبي يرف ليهه
بغداد..
النخل يتشابگ اويه الغيم
بغداد ندّه النده ..
او فاح عطر الطين
بغداد العنب والبرحي ..
طعم التين
بغداد الثقافة والدفو
بغداد..
موسيقى .. اوغناوي الفرح
ونسَه .. اودلال .. او عمر
بغداد قصَّه .. روايه اوشعر
بغداد..
الرصافي ، زهاوي ، الكرخي..
رفعة راس
بغداد .. ما تنداس !
بغداد (اعيون المهى) تتجادح اشمحله اللون
بغداد امدللة (منصور) .. و(المأمون)-
بغداد شيخه اعله الزمن .. عمر الكون
بغداد أم الهله .. والملگه بالخطار..
والچاي المهيل .. والسـَـمـَـر ويه الجار
بغداد..
(يابه او يوم) .. فدوه .. داد
بغداد..
شارع ابو النواس والمسگوف
اوكركرة الشباب ..عزَّه للأجداد
بغداد..
التمدن والبغددة .. وهيبة الحلوات
بغداد.
حنة عرس بچفوف الحديثات
بغداد..
-(جاي اوصفـِـچ) .. تتسابق الچلمات
بغداد..
شمعات النذر..
وابدجله خضر الياس
بغداد..
شدة ورد احسن ناس
بغداد.. تسحر اغانيهه
بغداد..فدوه التراچيهه
بغداد.. روحي امعلگه بيهه
بغداد.. حلوه .. ابأهاليهه
بغداد .. مو للغرب !!
بغداد .. انلِعـَـب بيهه..
انلِعـَـب بيهه

 

ينشر موقع “المسلة كتابات” جميع ما يرد اليه، شرط أن يكون خاليا من السب والشتم والأوصاف غير اللائقة على الجهات والشخصيات.

“المسلة كتابات” لا يتحمل مسؤولية الأفكار والآراء الواردة. المقالات والنصوص المنشورة تعبّر  عن وجهة نظر الكاتب فقط. 

Please follow and like us:

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *